Энгийн шилэн дээр нэмэлтээр дулааны боловсруулалт хийсэн физик болон механик шинж чанараар онцлог аюулгүй шилийг хатжуулсан шил гэнэ.

Энгийн шилийг 620-680 градусын өндөр температурт дулааны боловсруулалтад оруулсны дараа огцом хөргөснөөр шилний бат бэх 4-5 дахин нэмэгдэнэ. Тухайлбал уг шил дулааны боловсруулалтад орох үед шилний дотоод бүтцэд дулааны энерги нөлөөлж улмаар шилний гадаргуу дээр шахалтын хүч ихсэж, харин дотоод бүтцэд тэлэлтийн хүч эсрэг чиглэлд үйлчилнэ. Мөн хатжуулсан шилний дулаан дамжуулалтын эсэргүүцэл нь энгийн шилнээс ялгаатай байдаг. Физик болон механик үйлчлэлд илүү тэсвэртэй болох ба хагарсан тохиолдолд мохоо өнцөг үүсгэн жижиг хэсгүүдэд хуваагддаг тул аюулгүй шил гэж нэрлэгддэгээрээ онцлогтой. Эдгээр шинж чанар, онцлогуудаас хамааран орчин үеийн барилгын шилэн фасад, цонх, хаалганд түлхүү ашиглах хандлагатай болсон.

Хатжуулсан шилээр барилгын гадна фасадаас эхлээд өдөр тутамд бидний хэрэглэдэг ширээний шилэн тавцан, шүршүүрийн хаалт гэх мэт зүйлсийг хүртэл хийх бүрэн боломжтой байдаг. Өндөр температурт дулааны боловсруулалт хийж  гаргаж авсан тул дулааны үйлчлэлд тэсвэртэй болдог ба ил зуухны шилэн нүүр хүртэл хийж болдгоороо давуу талтай.

Хатжуулсан шилний үзүүлэлтүүд:

1.  Нягт (ойролцоогоор): 2.42-2.5 г/см³
2.  Гулзайлтын бат бэх: 120-200 МПа
3.  Шахалтын бат бэх: 800-1000 МПа
4.  Уян харимхайн шинж чанар: 68-72 ГПа
5.  Шугаман тэлэлтийн коэфициент: 9 x 10^-6 1/^оС
6.  Дулааны итгэлцүүр: 0.9-1.1 Вт/м*К
7.  Гэрэл нэвтрүүлэлт: тунгалаг шил 88-91%

Хэрэглээ:

• Механик ачаалал ихтэй орчинд эвдрэх эрсдэл бага учраас фасад, шилэн хана, тагт, автобусны буудлын хаалт, шилэн хаалга, шилэн хашлага, шатны хаалт, дэлгүүрийн витрин зэрэгт ашигладаг.
• Хүний аюулгүй байдал нэн тэргүүнд тавигддаг бүс нутагт олон нийтийн барилга (сургууль, эмнэлэг, худалдааны төв), орон сууцны хаалга, душны кабин, ариун цэврийн өрөө, цахилгаан шатны шилэн хаалт зэрэгт ашиглах нь цохилтод тэсвэртэй бөгөөд хагарахдаа бутардаг шинж чанараас нь хамааран тохиромжтой гэж үздэг.
• Температурын огцом өөрчлөлтийг тэсвэрлэдэг, хагарах магадлал бага учир гадна фасадын шил, наран талын том хэмжээтэй цонх, хүлэмж, зуух, плитканы хамгаалалтын шил зэргээр ашиглаж болдог.
• Тунгалаг, өнгөт, цайртай, хээтэй зэрэг олон төрлийн шилийг хатжуулах боломжтой тул гадаргуу тэгш, цэвэр харагддаг, архитектурын гоёлын шийдэл, дотоод заслын шилэн хана, тасалгаа, шилэн тавилганд ашиглахад гоёмсог харагдахаас гадна удаан эдэлгээтэй байдаг.